“Shkodër: Imzot Dodë Gjergji kremton Meshën e Shenjtë, nis muaji i Zojës me pjesëmarrje të madhe besimtarësh”

Dje, më 2 maj, në një atmosferë të mbushur me besim dhe përkushtim të thellë shpirtëror, Imzot Dodë Gjergji, Ipeshkvës i Dioqezës Prizren - Prishtinë, kremtoi Meshën e Shenjtë në Bazilika e Nanës së Këshillit të Mirë. Ky kremtim i veçantë shënoi fillimin e muajit maj, muaj i kushtuar në mënyrë të posaçme Zoja e Bekuar, një kohë e privilegjuar për lutje, reflektim dhe afrim më të thellë me Hyjin përmes ndërmjetësimit të saj amnor.

Në këtë kontekst, lutja e rruzares merr një rëndësi të veçantë si një rrugë e thjeshtë por e fuqishme, përmes së cilës besimtarët hyjnë në misteret e jetës së Krishtit dhe gjejnë paqe në zemër. Rruzarja mbetet një thesar shpirtëror i Kishës, një lutje që bashkon familjet dhe forcon shpresën në përditshmëri. Kremtimi u karakterizua nga një pjesëmarrje e jashtëzakonshme e besimtarëve, të ardhur nga famulli të ndryshme të Kosovës si dhe nga treva të ndryshme të Shqipërisë, duke krijuar një bashkim të bukur në fe dhe traditë.

Gjatë predikimit, Imzot Dodë Gjergji ndaloi me thellësi në historinë e vuajtjes dhe sakrificës së popullit shqiptar ndër shekuj, duke theksuar se, pavarësisht sfidave, ky popull ka gjetur gjithmonë forcë, ndihmë dhe ngushëllim pranë Nanës së Këshillit të Mirë. Ai ftoi besimtarët që edhe sot, në kohët moderne, të mos e humbasin këtë lidhje të gjallë shpirtërore, por ta kultivojnë atë përmes lutjes dhe besimit të qëndrueshëm.