Në Gjakovë të rinjtë pranuan dhuratën e Shpirtit Shenjt

Më 24 maj, në famullinë e Gjakovës, u kremtua Mesha e Shenjtë me rastin e ndarjes së Sakramentit të Përforcimit, Krezmimit. Në këtë kremtim u krezmuan të rinj dhe të reja, të cilët pas përgatitjes së tyre pranuan dhuratën e Shpirtit Shenjt.

Për të rinjtë e kësaj famullie, kjo ditë shënoi një hap të rëndësishëm në rrugëtimin e tyre të krishterë. Me anë të Sakramentit të Krezmimit, ata u forcuan në besim dhe u thirrën të jetojnë më me përgjegjësi lidhjen e tyre me Krishtin. Ky sakrament është shenjë e veçantë e pranisë dhe veprimit të Shpirtit Shenjt në jetën e të krishterit që i ndihmon të rinjtë të përballojnë sfidat e jetës me guxim, shpresë dhe besnikëri ndaj Ungjillit.

Të krezmuarit u ftuan të jenë dëshmitarë të fesë jo vetëm në kishë, por edhe në familje, në shkollë dhe në shoqëri. Në predikimin e tij, Mons. Hili Kabashi foli për rëndësinë e dëshmisë së krishterë në jetën e përditshme. Ai theksoi se të rinjtë janë të thirrur të jenë bartës të shpresës, dashurisë dhe paqes së Krishtit. Mons. Kabashi i inkurajoi ata që të mos e shohin fenë si një detyrim, por si një dhuratë që i ndihmon të jetojnë më mirë.