Imzot Hil Kabashi ndau Sakramentin e Krezmimit në Pjetërshan

Më 23 maj, në Vigjilje të Rrëshajëve, famullia Shën Jozefi Punëtor në Pjetërshan përjetoi një ditë të veçantë hiri, gëzimi dhe bashkimi shpirtëror, ku gjatë kremtimit të Meshës së Shenjtë u Krezmuan të rinj dhe të reja nga Imzot Hil Kabashi O.F.M. Ky kremtim ishte një moment i rëndësishëm për jetën shpirtërore të kandidatëve, të cilët përmes Sakramentit të Krezmimit u forcuan me dhuratat e Shpirtit Shenjt dhe u ftuan të jetojnë me më shumë përgjegjësi fenë e tyre të krishterë. Në këtë ditë të shenjtë, Kisha u kujtoi të rinjve se janë të thirrur të jenë dëshmitarë të gjallë të Krishtit në familje, në shkollë, në shoqëri dhe në jetën e përditshme, duke përhapur paqe, dashuri, falje dhe shpresë. Prania e familjarëve, kumbarëve dhe besimtarëve e bëri këtë kremtim edhe më të bukur, duke shprehur bashkimin e bashkësisë famullitare në lutje dhe gëzim për të Krezmuarit.

Vigjilja e Rrëshajëve na kujton se Shpirti Shenjt është ai që e forcon, e ndriçon dhe e udhëheq Kishën në çdo kohë. Në fund të kremtimit, famullitari Don Marjan Topalli falënderoi Imzot Hil Kabashi O.F.M., kandidatët, familjet, kumbarët dhe të gjithë besimtarët për praninë, lutjet dhe mbështetjen e tyre shpirtërore. Ai i besoi të Krezmuarit në mbrojtjen e Zotit, duke uruar që dhuratat e Shpirtit Shenjt të japin fryte të mira në jetën e tyre dhe në mbarë famullinë.