Dy meshtarë të Dioqezës Prizren - Prishtinë diplomojnë në Universitetin Papnor Gregoriana në Romë

Më 25 qershor 2026, pranë Universitetit Papnor Gregoriana në Romë, dy meshtarë të Dioqezës sonë, Don Meriton Dedaj dhe Don Daniell Markprekaj, përfunduan me sukses studimet e tyre, duke shënuar një moment të rëndësishëm për formimin akademik, kishtar dhe kulturor të klerit dioqezan.

Don Meriton Dedaj u diplomua po ashtu në Universitetin Papnor Gregoriana, në Fakultetin e Historisë dhe të Pasurive Kulturore të Kishës, në veçanti në Departamentin e Pasurive Kulturore të Kishës. Tema e tij kërkimore trajtoi rolin e të krishterëve të Ilirisë në Romë dhe kontributin e tyre në historinë, kulturën dhe trashëgiminë e Kishës. Në mënyrë të veçantë, punimi u përqendrua në figurën e Papa Gjonit IV, me prejardhje dalmate, në figurën e Pjetrit të Ilirisë, ndërtues i Bazilikës së Shën Sabinës në Romë, si dhe në praninë dhe rëndësinë e Shën Jeronimit në jetën kulturore dhe kishtare të Romës.

Don Daniell Markprekaj u diplomua në Fakultetin e Historisë dhe të Pasurive Kulturore të Kishës, në Departamentin e Historisë së Kishës. Tema e tij e diplomimit trajtoi pontifikatin e Papa Kalistit III dhe marrëdhëniet e tij me Gjergj Kastriotin Skënderbeun. Në këtë punim u vu në pah rëndësia historike e marrëdhënieve të Gjergj Kastriotit me Selinë e Shenjtë, të cilat dëshmohen nga korrespondenca diplomatike dhe nga mbështetja e papëve të kohës ndaj qëndresës së tij. Kjo temë sjell një kontribut të çmuar në ndriçimin e lidhjeve historike ndërmjet popullit shqiptar, figurës së Skënderbeut dhe Kishës Katolike.

Diplomimi i dy meshtarëve tanë është një gëzim për Dioqezën Prizren - Prishtinë dhe një dëshmi e rëndësisë që Kisha i kushton formimit të thelluar akademik, ruajtjes së kujtesës historike dhe studimit të trashëgimisë së krishterë. Përmes këtyre studimeve, historia e Kishës, lidhjet e saj me popullin shqiptar dhe kontributi i të krishterëve ilirë në Romë marrin një vëmendje të re dhe bëhen pjesë e një reflektimi më të gjerë shkencor e kishtar.

Dioqeza jonë i uron përzemërsisht Don Meriton Dedajt dhe Don Daniell Markprekajt për këtë arritje akademike dhe kishtare, duke u dëshiruar shërbim të frytshëm në të mirë të Kishës, të popullit të Zotit dhe të trashëgimisë sonë shpirtërore e kulturore.